Love is what we now can see
寫於：9月 29日 - 佔領運動發生第二日
呢兩晚瞓唔安食唔落。不過尋晚都已比前晚好得多，身處灣仔仍傳來金鐘政總嘅鼎沸人聲、告士打道又放催淚彈“嘭嘭嘭”、警車消防救護車成晚“遮菇遮菇”、臨天光時仲有直昇機低飛表演... 真係10小時立體身歷聲。想我點呀？
到尋晚，暴風雨前夕應有嘅安寧都俾 Whatsapp 同Facebook 發放嘅堅料、流料、放料嘈醒。瞓唔到，不如步署吓如果坦克車碌過嚟，究竟匿埋間屋扮死屍好吖，定係走落街同人群一齊衝去向銅鑼灣，咁樣死好似壯烈啲同有型。仲有人陪。
諗起「有人陪」三個字，雙手嘅不隨意肌就會自動攞部手機出嚟，不自覺但好刻意咁 log in 你依家都正在上緊嘅 Grindr , Jackd , Manhunt 等。附近綠色亮燈 on duty 人士，除咗熟悉但唔會打招呼嘅街坊之外，仲有唔少未見過嘅生口面。
你又生口面，佢又生口面，你睇吓佢，佢睇吓我，see & be seen 一輪之後，Viewed By 個 list 就自然長咗好多。有啲已經打哂卡咁改埋名叫：佔緊中、佔中ing、雞蛋與羔羊、海闊天空... 隔籬幾多米嗰啲，我估都唔會喺ZOO啩。而且除咗參與佔中嘅人，亦有人正在開工，默默緊守岡位。
此時此刻，此情此境，突然有種他鄉遇故知嘅情懷。自動地 Say 聲Hi, 但之前冇理會過對方有冇相、幾多歲、底定面？
而開場白，亦唔再係半夜三更時嗰啲 Still up? Why so late? Not sleeping? 等既反智又難答嘅問題。
慣常而最基本嘅必問題 What are you looking for? 亦冇問，因為自己都唔識答，平時習慣以 Anything 求其耍人。但依家looking for 咩嘢？
公義？前途？抗爭？未來？其實，簡簡單單一句 Everything 更加貼切。呢個Everything，包括你、我、他。
隔空閒聊，看似不著邊際：講吓政總依家現場情況、又講吓新聞有啲咩進展、其他區有咩發生、瞓吓街其實都幾涼爽、風平浪靜冇嘢做，睇見你寫咁多字正好打發時間。。。同樣係隨意閒扯，內容卻不覺得空洞，而且真實。
同時跟幾個人單獨聊天，但感覺每個人都唔同，好似更加立體真實，或者可以講，更似佢自己本人。雖然，有人仍然貫徹始終用乳頭做眼睛、肚臍做嘴巴，但講嘅說話，比較似用個心去講，唔係肺。
有人仍然係擺一張風景相，但我哋 NPSC “S for Still” 。我唔強迫唔追問，你唔想，我亦唔會勉強要，因為大家都係因為拒絕強權脅迫而走出嚟表態，而自己卻成日做强人所難嘅事，講得通咩？
第一次細心去欣賞一張張風景相，發覺原來看似耍你、唔認真、唔尊重人、令你好討厭嘅風景相，更能了解到對方嘅背景、性格、過去、想法、甚至理想。佢可能係想你睇到呢啲嘢，而唔係身體。
而其他人一張一張面照、身照、器官照，你的確一覽無遺咁睇到，但只係睇到佢嘅表面，唔知道佢係咩嘢人，亦冇講過佢內心任何一個故事。
一夜無眠大家靜觀其變，雖叫無驚無險，但事情更添變數，更難猜度 。天已亮，要返工嘅就返屋企沖涼換衫、有啲請咗假就返屋企瞓一陣，今晚再來。而我嘅撤退大計，當然仲未步署好，但太眼瞓嘞，睇吓個鐘應該可以瞓多3個鐘，瞓醒再算。
大家萍水相逢，留唔留contact 其實都冇所謂，呢一刻好似突然睇得通透：有心要搵你嘅，點都會搵到；而冇心嘅，佢可能在 contact list 求其俾個靈位安置你，佢係每日都見到，但唔會有一句問候。
輕鬆道別，不留痕跡。處身今日唔知聽日事嘅時世，最後送你一句 Good Luck。
但諗番起又有啲諷刺，好多時人哋同你講咗句：Sorry, not match ! 之後，然後你忿忿不平贈番一句： Fine, thanks. GOOD LUCK ! 而佢亦禮尚往來： You too !! 然後鬥快 Block 對方，殺之而後快。
而呢句 Good Luck, 充滿怨恨、嫉妒、憤慨、咒詛，奇毒無比。講得出口，自己聽番都不禁心寒。
但今日我哋大家互祝呢一句Good Luck，講出咗說話嘅原意、真意，同大家嘅真心：
Hey, you will be fine. Good luck!
Thanks, you too!
Take care
※※ 這一刻感到正能量嗎？何不轉寄推介予那個你想起的人。人影響人。你每天不斷影響身邊不同人，只是有所不知。但你更不會知…… Love Actually 其實愛，就在此。※※
發表文章
