手機交友 App 軟件帶來的災難（一）

條目： 少咸多趣齊 have fun （樂而不淫、少鹽多 fun）

又到星期六嘞，各位「未成家立室」嘅朋友、甚至「已有家室」嘅朋友都都好喇，隻手可能有啲痕， 走去「 交友撩波」手機軟件 App，識吓人搵吓朋友，如果對方都鍾意運動，一齊去打番場波，增進友誼。

「未成家立室」嘅朋友，去結識朋友、打吓波，就好正常吖，快啲去！快啲成家立室！

位置搜尋功能令你行蹤無所遁形

咁以下呢番說話就係同「已有家室」嘅朋友講嘅：如果真係有人想追蹤你，只要你全日又開又關軟件，系統會不斷更新你同對方嘅距離，如果對方係心水清嘅人，咁你其實去過邊度，甚至可能見過邊個人，對方都知呢！

香港男男圈子流行嘅軟件，Jack'd、Manhunt、Scruff 等，由於設計上有按地理位置搜尋功能，由 Mobile Devices 移動裝置中之 LBS （Locational-base Service 移動定位服務）技術支援，咁用戶在冇選擇情況之下，佢嘅位置距離就一定要顯示，如果唔係，你點會在軟件上睇到其他人嘅位置？

而元祖級軟件 Grindr 就冇相關功能，雖然同樣可顯示對方距離，但就有選項讓你決定是否公開顯示。系統亦因為不需支援「按地圖搵人」而處理龐大數據，所以對於附近位置所在嘅朋友，可以更精準顯示到雙方距離，甚至在幾多尺或幾多米之內亦顯示得到。

Grindr 應較安全，點知帶來災難

好嘞，戲肉就響呢度！如果係「已有家室」嘅朋友、上呢類交友軟件係一個「不能說的秘密」， 而又咁好彩，就算你 Profile 矇頭冇面，但係就化咗灰都認得你，無論你用 Jack'd、Manhunt、Scruff ，有心人只要將你收藏 Add Favourites（或者再高明啲，唔 Add 你怕打草驚蛇，每次都跟據你年齡、身高、體重等，將你搵出嚟） ，而只要你時不時 Online，你今日大概嘅行程，好簡單順序組織一下，你幾點去過邊度，大概都會知道。

不過，亦因為用戶太多，需處理嘅數據量極為龐大，所以資料更新比較慢，數據很難實時反映，你嘅路線圖及實際時間地點，面目比較模糊。

相反，如果你用 Grindr，理論上應該可以跌落安全網，因為你個 Profile 唔可以用位置搜尋到，只可見到你最後 online 時間。

Grindr 雖然係「老 seafood」但因為佢2009年已經推出，霸佔咗市場佔有優勢，再加上佢殘缺不全嘅功能，反而更能保障個人私穩，所以不計中國大陸，用戶仍然較多。但你要記住，雖然用戶多，但功能少，尤其欠缺地圖搜尋功能，所以處理數據較快，用戶幾時在不同地方 online，距離能夠實時反映。

因此，如果你唔知因為係蠢定懶、定係只識把口講 discreet，但係做人一啲都唔謹慎，而連 Distance Shown 嘅功能都竟然冇關上，咁將會為你帶來災難性嘅後果！你呢個 discreet，可能會變咗好多人都串錯嘅 discrete（分離）！

因為…… 

（賣吓關子先，下回再講）

※※ 這一刻感到正能量嗎？何不轉寄推介予那個你想起的人。人影響人。你每天不斷影響身邊不同人，只是有所不知。但你更不會知…… Love Actually 其實愛，就在此。※※

扮嘢扮到底、其實露哂底、自己最蝕底

條目：少咸多趣齊 have fun （樂而不淫、少鹽多 fun）

標題講緊嘅，係由「全民皆 Vers」引申出嚟嘅現象。其實有幾多真係 Vers，大家心知肚明嘅；冇人講過一定係 0 號扮 Vers，亦有可能係 1 號扮 Vers 都得…… 不過，大家又係心知肚明嘅！

由於唔知邊位偉大嘅古人，發明呢個用「其中一種」性交形式（肛交）中施予及接受方嘅角色，界定男男圈子不同屬性。真偉大！不過就多得佢，我哋每次 label 自己時都好似揭開個肚皮俾人睇，上床做咩嘢都要向公眾交代咁。因此，好多人唔會咁坦白公開真正身分，所以 每個人的 self-label 背後，都可能藏著「不能說的秘密」！真正身分，由你去偵查。

係，明白，心照！之不過，有時去到啲關鍵時刻，自己開哂口問人係「底定面？」 雙方要決定「去馬」or not 嘅時候，不如就坦坦白白、做人大方一啲，係邊樣咪講囉。

但係，好多人就好老土又唔老實、扮嘢要扮到天腳底，一來嘥氣、二來無謂、以為人哋唔知，但實際上已經「露哂底」！

你又係Vers? 一句 OIC 之後變失蹤人口

我有一位自稱為「全能好手」嘅朋友，名副其實猛一爽零，佢見世面唔少，亦領教過唔少 「Vers」，仲令佢好激心。

佢話都不知N次，明明對方撩佢傾偈先，開頭態度仲非常熱情。雙方 show hand 之後，副牌係兩個都 Vers！好事吖，最精彩嘅配搭添！

點知對方一句「OIC」之後，就已經失踪咗 ，連影都冇，bye 都冇聲。說好的，熱情呢？咁就唔駛問阿貴，即係自己扮 Vers，仲要以己度人，以為人人都同佢一樣，同流合污！

如果大大方方，話自己比較鍾意墊底，咁人哋又真係 Vers，咁咪立即 You have place? When & Where 囉！仲有呀，依家「僧多粥 (top) 少」，嗰啲「粥」可能都當係「Joke」咁，首先自認係 Vers 先，到傾到入肉嘅時候，先至表露身分。

照咁睇，嗰啲人扮 Vers 扮到底，其實在別人眼中好易「露底」，而且好「蝕底」，明明係有 Chance，就變咗「餐屎」，係差中之差，我哋一齊送佢一個字：抵！

「驗明正 Vers 」 理論公諸同好

由於 deal with 過太多 「扮 Vers 又唔老實」的人，我嘅朋友提出咗一套「驗明正 Vers 」嘅理論，佢話唔介意我公諸同好，俾大家參考。

第一，如果你話係 Vers，佢又話係 Vers，咁幾好吖，可以傾啲到肉啲喇。但佢首先唔出聲，敵不動我不動，之後對方無喇喇又問：You Top more or Bottom more ? / Do you have any preference?
咦，Vers 咪 Vers 囉？仲要問？有古怪！

第二，如果覺得係疑似個案，或者對對方根本就冇咩興趣、最好耍走佢的人，佢會直接鏟過去話自己係 Vers BOTTOM，個字仲要 capital letter + bold，咁對方就立即現形嘞：

1. 一係就話 Sorry not match、
2. 一係就鬼鬼祟祟粒聲唔出就走人、
3. 一係就衰格到 block 咗人，好似人哋欠咗佢咁

佢話如果真係 Versatile，就算偏 0 至 90% 嘅 Vers Bottom，只要有10% 想做 1，都唔會覺得同另一個 Vers Bottom，有任何唔夾之處。

只有從來根本冇企圖或意圖做 top、借Vers 之名招搖撞騙嘅「濫竽充 Vers」，唔只扮嘢仲要扮到底，但其實人哋略施小計，就令佢原型畢露，起清佢個底。

真正 10號 Vers：我有切膚之痛！

佢越講越勞氣，仲講到好激動：

「佢哋生得幾靚、扮到幾正都冇用，你會留意到佢哋成日食白果，然後就埋怨香港冇 Top，Ocean of Bottom。 其實邊到係吖，有時我都唔知幾旺！

其實我用半個 Top 嘅身分講，雖然搵 Bottom，但係我鍾意嘅係男人，唔係女人，但係你睇吓呢啲行為：小家、鬼祟、唔大方、唔老實、仲有就係死蠢，真係女人都甘拜下風、冇呢啲特質啊！所以我鄙視佢哋！

Bottom 太多，分贓唔勻？咪玩喇！你睇台灣大陸嗰啲所謂「公 0」，人哋 Man 到震呀，大大方方打正旗號係零號，大把人溝，不知幾高竇呀。嗰啲學人叫做 Vers 喎！挑！」

嘩，好激，為乜事呢？後來我 find out，因為佢作為真正嘅 Vers，但成日俾人串、俾人揶揄、俾人懷疑：「唉，Vers 咩嘢吖，算把喇，咪即係零？」而同時，又成日見到 「濫竽充 Vers」種種劣行，所以有切膚之痛！

※※ 這一刻感到正能量嗎？何不轉寄推介予那個你想起的人？人影響人。你每天不斷影響身邊不同人，只是有所不知。但你更不會知…… Love Actually 其實愛，就在此。※※

中文科 + 動物百科：猴、狒、熊、豬

條目：實用基語潮文成人班（唔識溝通，點樣溝？點會通？）

各位，我哋呢度好多嘢學㗎，一得閒上網就唔好淨係掛住睇男仔、Hi 男仔。男仔通街都係，成日都響度，有啲日日都見佢哋㗎，好似響度返工咁㗎，睇少一次半次！橫掂聽日又會見到佢哋。

俾心機上堂學吓嘢，增值咗自己先，你識咁多嘢、咁博學多才，成個才子咁，散發出書卷氣，到時就唔係你 Hi 男仔！男仔同你 Hi！知冇？

今堂我哋唔教英文，你哋成班都好似鬼仔咁嘞，今日教中文，仲帶你哋認識百獸，係「動物百科」。知唔知咩嘢叫 猴、狒、熊、豬呀？知唔知自己係猴定狒定熊定豬呀？

（一）猴
就係瘦削體形，冇咩嘢脂肪，奀奀瘦瘦咁，但都仲有分，有啲結實啲，有 Muscle 嘅，叫「肌肉猴」、「力量猴」，仲有啲就瘦到好似香雞咁，手無搏雞之力，就係「瘦弱猴」。猴子體形係輸蝕咗，但係都多人鍾意㗎，如果係「美猴」。

用英文可以叫 Thin, Slim , Lean, Skinny
　　
（二）狒
其實就係界乎猴同熊之間， 體形勻稱啲，又唔肥、又唔瘦，體形長長、適中又平衡，唔太肥壯又唔太瘦弱，算係大隻獸之一。如果再比較大件頭，又未去到熊族，就算係「壯狒狒」嘞。

 
英文可以叫 Average, Jock, Fit, Athlete, Toned

（三）熊
壯碩體態、虎背熊腰，是巨型猛獸，予人力量型感覺，品種繁多，主要有：「毛毛熊」、「黑壯熊」、「肌肉熊」、「小熊」四種。

其家族成員亦多，例如雌性荷爾蒙較旺盛的，是「娘熊」、「母熊」，而品種較優良嘅，在香港會被稱「靚熊」、台灣則有「U熊/優熊」

而用英文，可以稱為 Bear, Muscular, Strong, Stocky, Rugged

（四）豬
肥胖體形、脂肪比例超標、肌肉鬆弛、雖體型同樣巨大，但沒有力量的感覺。由於豬在現代審美標準，被視為不太優秀，有待改進。

在被忽略嘅情況下，豬以為在體重上驟眼可與熊看齊，而自稱為熊，諗住魚目渾珠，但係我哋對眼唔係魚目，係睇得出，亦因此，我哋稱之為「豬扮熊」現象。
　　
在英文上，可以稱呼為 Fat, Big, Large, Chubby

以上，係中文世界中，從體形大小對各種動物嘅分類。

除咗「猴、狒、熊、豬」這個比較主流嘅說法，也有人提倡「妖、猴、狼、熊、豬」 這個分類，除咗將「狼」取代個名發音嘛嘛哋嘅「狒」，另外加入非動物類、「妖精」來區分另一類朋友。

但咁唔係唔理想，講到底我哋同舟共濟、四海一家、主內弟兄、獅子山下、血濃於水、一夜夫妻、同一屋簷下、有今生冇來世 …… 唔好咁刻薄，大家都係動物，要相親相愛，唔好恃住大隻就蝦人哋，欺負弱小，知唔知？

※※ 這一刻感到正能量嗎？何不轉寄推介予那個你想起的人。人影響人。你每天不斷影響身邊不同人，只是有所不知。但你更不會知…… Love Actually 其實愛，就在此。※※

香港1/0/10亂局 = 叉燒/油雞/叉油雞亂局

條目：少咸多趣齊 have fun（樂而不淫、少鹽多 fun）

再講番香港男男圈子1 / 0 /10 嘅分布比率，莫講話仲未有認真統計，就算有做，得出結果都係「得啖笑」，大家唔駛當真，絕對不能反映現實。

因為我哋習慣咗用一種好局限、具引導性嘅方法，去詢問對方嘅「霖把」，（性角色取向 Sex role orientation）但係，「霖把」究竟係乜嘢、定義係點、如何劃分？其實連自己都唔清唔楚，對方又好似一舊雲咁。咁連發問嘅問題，本身都係一個問題，你覺得呢個結果有幾可靠呢？

「叉燒、油雞、叉油雞」亂局

最終成件事，會變成我形容為： 「叉燒、油雞、叉油雞、蔥油、飯」之亂局

我絕對有理由相信，90% 以上男男在對話內容裡面，會在頭 5 項對答中包括呢條必答題：

“Are you top or bottom？”

~~講完，請回答，計時！

一係叉燒 （1 號 top） 、一係油雞 （0 號 bottom ） 只得兩味！反應慢啲，轉數冇咁快嘅人，咁就是但揀一樣喇！

有啲人醒目啲，識得提出：唔係喎，我兩樣都想食喎，我要叉油雞（10號 Versatile）應該得掛？

咁原本揀咗叉燒或油雞嘅，其實真係兩味都啱嘅，立即紛紛跳船，過檔去食叉油雞；

揀咗叉燒嗰班，見原來可以揀兩味，試吓都冇壞喎，又走去揀叉油雞；

另外揀咗油雞嘅，見原來成棚人都係油雞，心諗應該冇啖好食，點搞呢？不如又去揀叉油雞，咁樣可能搵到食，唔駛捱餓；

之後又有一班人走出嚟話：其實我哋食齋，唔食肉㗎！俾碟白飯我，我點蔥油送飯都得啫？吓，原來都係要收咁多錢？

咁食齋呢班人，一係求其揀兩味叉油雞，一係就睇情況，睇吓對家食邊樣、佢就揀第二樣，希望可以夾到，搵到餐食。

終於，就大多數人都揀哂叉油雞嘞！

終於，燒味店老闆就走出嚟講以下呢番說話：

燒味店老闆：苦口婆心話你知

「唉，呢班人都係自己攞嚟搞嘅，我都原本整好哂一碟碟，樣樣都有齊，好地地。

之不過，佢哋又麻麻煩煩，又話呢樣唔食、嗰樣又戒咗，樣樣都唔啱口胃，淨係要食邊樣邊樣。但把口係咁講，個心又唔係咁諗喎！

叉燒嗰班（1號 Top），有啲原來係覺得 「油雞 」兩個字發音，似女人個 X 喎，佢咁 man 所以唔係，佢係叉燒！之不過其實佢都鍾意叉燒，啖啖肉咁，食過發覺原來幾好味！

油雞嗰班（0號 Bottom），有啲竟然話佢鍾意男人，叉燒先係男人，所以鍾意叉燒， 原來佢覺得油雞同佢自己都唔係男人！？另外，有啲又話，驚唔識食油雞、未食過、要 lur 骨好難食；有啲話自己唔夠力、年紀輕，驚 handle 唔到喎！唉，食雞啫，又唔係叫你劏雞，冇力！

都未算， 叉燒又好、油雞又好，講講吓，原來有啲人唔係真心鍾意食，只係因為有邊樣唔啱口味，所以就揀第二樣，其實問心，兩樣唔食都得，唔駛佢食邊樣就得嘞！

食齋嗰班（N/A 不適用），又有部分係齋口唔齋心，有時又走去偷食。又有啲原來係扮哂嘢，把口話唔食，見到有靚叉燒、靚油雞，咪又走去食？

你咁鍾意分，準備有排要食自己

所以呢，我就覺得分來分去，你唔覺悶，我都覺得你哋好鬼煩！ 根本就冇可能分得勻。分好哂嘞，你又嫌佢冇叉燒、佢又嫌你食齋、你同佢又嫌佢同你成碟油雞！

不如咁，唔好分，一人一碟， 「叉燒、油雞、蔥油、飯」，全部都係你嘅，你可以偏食，唔鍾意食嘅都係你嘅，擺響度唔好理。你同邊個夾啲嘅，你分啲俾佢、佢分啲俾你，咁咪得囉，大家開開心心。

仲有呢個只係食飯嘅嗜好啫，食飯食幾耐？一個鐘半個鐘好未？食完飯咯，咪一齊去睇戲、行街、買衫、打機、唱K，大把嘢做！

你咁鍾意分，仲要分得咁清清楚楚，又要佢都係分得清清楚楚先同佢一齊食飯，咁你慢慢搵、慢慢等，但要有心理準備、有排食自己！」

老闆嘅心聲，唔知你聽唔聽得明呢？

※※ 這一刻感到正能量嗎？何不轉寄推介予那個你想起的人？人影響人。你每天不斷影響身邊不同人，只是有所不知。但你更不會知…… Love Actually 其實愛，就在此。※※

快閃過兩招 + 實用基語潮文：由尾讀上去，就知 looking for 乜！

條目：少咸多趣齊 have fun - 快閃過兩招

條目：實用基語潮文成人班

據心理學家話，當一個人偽裝、掩飾嘅時候，就會好不只覺咁，用好多其他嘢去掩蓋，以為人哋睇到，其實為咗俾自己安全感呀！

所以，如果有人將一啲好簡單嘅嘢，拉到好長咁講，咁就可能有古怪，「呢個人相當有嫌疑！」

所以，如果你簡單問句：“What are you looking for？”

“Well, I'm open to anything here. I'm fine with only a chat, and maybe making friends also cool. All depends, really! Hm… just so happen, I have luck to meet a nice guy and we both like each others and also match well in sex, though I am usually not very much into casual hook up, just in case he is also keen to meet, I think I don't mind to have fun.”

寫論文咁，知咩事喇。咁，邊句至係真呀？嗱，由尾睇番上去！用好多嘢掩蓋住，混淆視聽，收到落最底底，佢覺得最安全，「你睇我唔到」嗰個，咪答案囉！

※※ 這一刻感到正能量嗎？何不轉寄推介予那個你想起的人？人影響人。你每天不斷影響身邊不同人，只是有所不知。但你更不會知…… Love Actually 其實愛，就在此。※※